По Охрид и Битола, Стопанската комора на Северна Македонија, во соработка со Министерството за образование и наука и со поддршка на проектот „Образование за вработување – Е4Е@мк“, продолжи со активностите за промоција на угостителско-туристичкиот сектор и во Скопје. За таа цел, во Средното училиште на Град Скопје „Лазар Танев“ се реализираше еднодневен настан за запознавање на основците од општините Центар и Аеродром со кариерните можности во туризмот и угостителството.

Основната општествена улога и мисија на училиштето е да образува ученици со квалитетни и применливи знаења, умеења и вештини, како и навики и способности за совладување на современите технологии. Училиштето создава стручен кадар оспособен за примена на научните достигнувања во практиката, како и за одговорно и креативно однесување спрема работата, општеството и спрема самите себе.
Околу 500 редовни ученици на возраст од 14 до 18 години, како и голем број вонредни ученици од различни возрасти годишно ја следат наставата во СУГС „Лазар Танев“.