Здружението на градежништвото, индустријата на градежни материјали и неметалите на 27 јануари 2026 година ја одржа втората седница со новиот состав на Управниот одбор, на која присуствуваа и претставници на компаниите членки.

На седницата беше презентиран Извештајот за работата на Здружението за периодот 2020–2025 година, како и образложен Предлог-планот за работа за наредните пет години.

Имајќи ја предвид улогата на Здружението како организација со најголем број членки, беше потенцирана одговорноста планираните активности да се реализираат системски и организирано. Во таа насока, беше договорено Предлог-планот да им биде доставен на компаниите членки во работна верзија, со цел прибирање дополнителни предлози и препораки, по што документот ќе биде финализиран.

Беше претставен Планот за наредните 5 (пет) години и како клучни приоритети во наредниот период се утврдија следниве активности на Здружението:

• поефикасно функционирање на органите на управување;
• остварување регионална соработка со сродни организации од соседните земји, со акцент врз најблиските со кои најмногу соработува овој сектор, и тоа Србија, Црна Гора, Босна и Херцеговина и Косово;
• продлабочување на соработката со стручните домашни асоцијации и институции;
• поддршка на стручното образование преку соработка со средните стручни училишта и со Градежниот факултет;
• интензивна соработка со Владата и со ресорните министерства за поголемо учество на домашните компании во инфраструктурните проекти;
• иницирање законски измени во интерес на домашната градежна индустрија.

Целта на ваквиот пристап е системско решавање на предизвиците со кои се соочуваат компаниите од секторот, како и создавање поквалитетна и попредвидлива деловна средина.

Во моментот беше истакнато дека се работи на:

• системско решавање на проблемите на компаниите преку координација со институциите;
• измени на законската регулатива, особено во делот на јавните набавки;
• иницијатива градежништвото да биде утврдено како стратешка гранка од национално значење;
• подготовка на договор за стратешко партнерство со Министерството за транспорт.