Гувернерот на Народна банка на РСМ проф. д-р Трајко Славески, пред раководството, органите и телата на Стопанската комора предводена од претседателот Бранко Азески, за прв пат од неговото именување имаше работна средба со претставниците на бизнисот.

На средбата, претседателот Азески во улога на домаќин отвори повеќе прашања за кои надлежност има Народната банка од аспект на улогата за одржување на стабилноста на цените и девизниот курс, но и да води сметка за економскиот развој на државата. Укажа и дека за бизнисот сѐ уште клучни проблеми се борбата против корупцијата, сложените банкарски процедури за граѓаните и за компаниите, транспарентноста која изостанува во делот на информациите за државната помош со странските инвеститори, за стоковните резерви, за девизните резерви.

Во своето обраќање гувернерот проф. д-р Славески пред присутните посочи дека девизните резерви моментно изнесуваат 4,6 – 4,7 милијарди евра што е сосема комотна позиција за земјата, а покриваат околу 4,5 месечни вредности на увозот додека светскиот стандард што се препорачува е 3 – 3,5.

На работната средба гувернерот посочи и дека треба да се стремиме кон ниски стапки на инфлација и на среден рок надлежните институции треба да делуваат, инфлацијата да биде на ниво на она што е во еврозоната.

Гувернерот д-р Трајко Славески информираше дека одлуката на Советот на Народната банка за воведување на нова и поедноставена структура на надоместоци за користење на услугите на Македонскиот интербанкарски платен систем – МИПС, ќе стапи на сила на 1 август и истата ќе овозможи пониски трошоци за електронски плаќања и за граѓаните и за компаниите, со што Народната банка повторно испраќа јасна порака за поддршка на пошироките економски придобивки од достапни и ефикасни платни услуги. Во разговорот беше потенцирано дека стабилниот и конкурентен банкарски сектор е клучен за поддршка на стопанството, а Народната банка и натаму останува отворена за дијалог со деловната заедница со цел создавање на подобра економска клима и пристап до квалитетни финансиски услуги.

Со реализирање на работната средба во Комората, практично се потврдува воспоставената пракса, секој нов гувернер на Народната банка на Република Северна Македонија првиот настап да го има на адресата на СКСМ, Димитрие Чуповски.