Европскиот дигитален иновациски хаб (EDIH) ДигитМАК ја зајакнува регионалната и прекуграничната соработка преку потпишување на два меморандуми за соработка со AgroDigiRise EDIH и EDIHCS од Бугарија. Меморандумите воспоставуваат рамка за долгорочна соработка, размена на знаење и заедничка поддршка за компаниите и јавните организации кои се стремат кон дигитална и зелена трансформација.

Соработката ја иницираа Стопанската комора на Северна Македонија (СКСМ), партнер во конзорциумот наДигитМАК, и Клинтек Бугарија (Cleantech Bulgaria), партнери во конзорциумите на AgroDigiRise и EDIHCS. Соработката беше формализирана за време на состаноците во Софија, каде што претставниците на партнерските организации ги потпишаа меморандумите за соработка и ја потврдија својата посветеност на зајакнувањето на регионалниот иновативен екосистем.

Претставниците од Стопанската комора во име на ДигитМАК , Михајло Донев, помошник-оперативен директор за развој, иновации и знаење и Даниел Матракоски, координатор за меѓународна соработка и претставниците на Клинтек Бугарија во име на AgroDigiRise, Маријана Хаманова, извршен директор и Марија Накова, раководител на EDIHCS, се согласија дека овие нови партнерства претставуваат повеќе од институционална соработка и им носат повеќе можности на македонските и бугарските компании да користат прекугранични услуги, да се поврзат со комплементарни иновативни екосистеми и да стигнат до експертиза што можеби не е достапна во нивните национални иновативни средини. Партнерствата ја одразуваат основната визија на иницијативата Европски дигитални иновативни центри: создавање поврзана мрежа од иновативни центри што им овозможува на компаниите пристап до експертиза, капацитети за тестирање, инфраструктура, инвестициски можности и специјализирани услуги преку националните граници. Преку оваа соработка, компаниите од Македонија и Бугарија ќе добијат подобрен пристап до комплементарни иновативни екосистеми и прекугранични ЕДИХ-услуги.

Соработката е во согласност со приоритетите за паметна специјализација на двете земји, фокусирајќи се на сектори со висок потенцијал за одржлив раст и дигитална трансформација.

Една клучна област е градежништвото, одржливите материјали и паметните згради, каде што ДигитМАК и EDIHCS ќе ги поддржат компаниите во усвојувањето напредни технологии како што се информатичко моделирање на градби (BIM), дигитални близнаци, вештачка интелигенција, паметни инфраструктурни решенија, материјали со ефикасна употреба на ресурси и пристапи од циркуларната економија. Компаниите во градежништвото, архитектурата, инженерството и производството на градежни материјали ќе имаат корист од проширениот пристап до експертиза, објекти за тестирање и иновативни услуги.

Втора фокусна област е Паметно земјоделство и храна со повисока додадена вредност, каде што ДигитМАК и AgroDigiRise ќе ја промовираат соработката во прецизното земјоделство, дигиталното управување со фарми, вештачката интелигенција, апликациите на „интернетот на нешта“, практиките за одржливост и производството на храна со додадена вредност. Партнерството ќе создаде нови можности за земјоделците, преработувачите на храна, снабдувачите на технологија и истражувачките организации од двете земји.

Со поврзување на иновативните екосистеми на Северна Македонија и Бугарија, ДигитМАК, AgroDigiRise и EDIHCS создаваат посилни темели за дигитална и зелена трансформација во стратешките сектори. Партнерствата ќе ја зголемат конкурентноста, ќе поддржат раст преку иновации и ќе им обезбедат на компаниите поголеми можности за пристап до знаење, технологии и услуги низ целата мрежа на Европските дигитални иновациски хабови.