Во Стопанската комора успешно се одржа Бизнис-форумот посветен на патната и енергетската инфраструктура, организиран во соработка со австриските институционални партнери. Настанот обедини високи владини претставници, раководители на клучни државни институции и јавни претпријатија, како и претставници на водечките деловни заедници од двете земји, отворајќи директни перспективи за конкретна економска соработка во претстојните капитални инвестиции.

Форумот го отвори претседателот на Стопанската комора, Бранко Азески, кој потенцираше дека главен приоритет на стопанството мора да биде практичното поврзување и брзата реализација на терен:

„Без брзи, модерни и безбедни патишта, без модернизирана железница и без предвидлив, одржлив енергетски систем, македонската економија не може да направи реален исчекор. Македонските компании не треба да бидат само пасивни набљудувачи, туку рамноправни партнери во големите инфраструктурни инвестиции што претстојат. Домашната бизнис-заедница има знаење, капацитет и мотив да биде рамноправен чинител во изведбата на овие сложени проекти“, истакна Азески.

Министерката за енергетика, рударство и минерални суровини, Сања Божиновска, го претстави развојниот потенцијал во делот на обновливите извори на енергија и предизвиците на зелената транзиција:

„Фокусот го ставаме на забрзаната енергетска транзиција, стабилноста на електроенергетската мрежа, системите за батериско складирање и потенцијалот на зелениот водород. Ова се современи технолошки сегменти каде што соработката со искусните австриски субјекти може веднаш и значајно да се интензивира со цел постигнување долгорочна енергетска независност.“

Заменик-претседателот на Владата и министер за транспорт и врски, Александар Николоски, посочи дека транспортната поврзаност и регионалните коридори претставуваат клучен предуслов за забрзан економски развој и за јакнење на македонскиот извозен капацитет:

„Македонија влегува во сериозен инвестициски циклус во патниот и железничкиот сообраќај, особено вдолж коридорите 8 и 10. Австрија поседува напредни технологии, опрема и долгогодишна инженерска експертиза кои му се неопходни на нашиот пазар, а нашето искрено очекување е австриските компании да воспостават цврсти партнерства со домашните градежни капацитети преку заеднички настап.“

По завршувањето на пленарниот дел, фокусот целосно се насочи кон практичниот деловен сегмент. Во исклучително динамична работна атмосфера се реализираа над 80 билатерални состаноци. Овие средби опфатија интензивни институционални консултации со ресорните министерства и јавните претпријатија околу процедурите и планираните капитални зафати, како и бројни директни разговори меѓу претставниците на стопанството од двете земји. Ваквиот непосреден дијалог создаде одлична основа за формирање конзорциуми, трансфер на врвно знаење и заеднички настап на претстојните тендери во областите на железничката автоматизација, патното инженерство, безбедноста во сообраќајот, хидроенергијата и современото управување со водните ресурси.