Преку организирано делување во рамките на Стопанската комора, рент-а-кар компаниите ќе ја зајакнат соработката со останатите здруженија при Комората, лизинг компаниите, осигурителните друштва и станиците за технички преглед, како и со МВР и другите релевантни институции за нивното работење. Имено, со воведување на проектот на МВР „Безбеден град“ се отвораат низа практични прашања во врска со примената на новите правила, особено за рент-а-кар и за лизинг компаниите, поради што е неопходно дополнително усогласување и прецизирање на обврските во директен дијалог со Министерството за внатрешни работи.

Членките на Групацијата ќе се залагаат за воведување лиценци за работа, за поголема дисциплина и за подигање на сообраќајната култура, односно за построго и поодговорно почитување на сообраќајните прописи од страна на сите учесници во сообраќајот. Целта на членките на Групацијата е заеднички во соработка со МВР да работат на подигнување на јавната свест за безбедност во сообраќајот, преку кампањи и активности, како и со одговорни приватни компании (лизинг компании, осигурителни друштва, станици за технички преглед) и други чинители.

Со формирањето на оваа нова групација, Стопанската комора на Северна Македонија дополнително се позиционира како сеопфатна комора која ги обединува и ги застапува интересите на компаниите од сите сектори, и се потврдува како препознатлива институција што професионално и ефикасно ги брани интересите на своите членки.

Стопанската комора на Северна Македонија, основана во 1922 година, е водечко независно бизнис здружение во земјата, кое застапува широк спектар на индустрии. Нејзините компании-членки генерираат половина од вкупниот приход на приватниот сектор и речиси половина од неговиот нето профит, вработувајќи еден од секои три работници во приватниот сектор.

На конститутивната седница за претседател на Групацијата за изнајмување возила (рент-а-кар) е избран Бранко Рафајловски, директор на АБЦ рент а кар.