Петтата генерација во Академијата за претприемништво и менаџмент, дел од Фондацијата „Прогресив академија“ Виница, почна со обука, со што се отвора ново поглавје во создавањето идни лидери и визионери во бизнисот. Обуката ќе трае шест месеци. Учесници се преставници на компании и лица од регионот, но и респектирани и активни членки на Стопанската комора.

Претседателот на Стопанската комора БранкоАзески, во улога на претседател на Одборот на директори на Прогресив академијата потенцираше дека оваа институција претставува столб на современото менаџерско и претприемничко образование во државата. Истакна дека преку вакви иницијативи се создаваат генерации на нови лидери кои ќе бидат двигател на развојот, иновациите и конкурентноста на македонската економија.

Генералниот менаџер на Макпрогрес груп од Виница, Глигор Цветанов, и член на бордот на директори на Академијата, им порача на младите дипломци дека се доказ оти македонскиот бизнис има иднина. Со врачувањето на сертификатите на дипломците од четвртата генерација заврши уште еден циклус на образование и практична подготовка на младите претприемачи и менаџери и тие со ова, според Цветанов, излегуваат подготвени да одговорат на современите предизвици.

Цветанов, пред завршените студенти на четвртата и пред новите, од петтата генерација што сега ја започнуваат едукација, истакна дека за него Академијата за претприемништво и менаџмент има посебна вредност, појаснувајќи дека и самиот минал низ многу обуки за менаџери, што го подготвиле за мигови, кога животот и бизнисот ќе ве стават на испит, потсетувајќи на пожарот во фабриката од пред дваесетина дена, во кој изгоре еден производен погон и три магацини.

Како што посочи оваа криза беше суров доказ дека секој бизнис носи ризици. Но, во исто време и најголема лекција – дека токму принципите на Прогресив академијата се тие што прават разлика: брзината на одлука, решителноста, истрајноста и лидерството. Рече дека верува дека и сите оние кои излегуваат како дипломирани прогресивци, се подготвени да бидат токму такви лидери – кои нема да се скршат во криза, туку ќе израснат уште посилни.

Во  програмата на Академијата за претриемништво и менаџмент ќе бидат опфатени: деловна стратегија и бизнис процеси, организациска трансформација, корпоративна иновација, маркетинг и продажба, финансии за топ менаџмент и лидерство и деловни комуникации.