Соопштенија, вести, актуелности - Приказ на содржина

07.02.2018


Актуелно  

Се токмат законските измени за продажба на алкохол по 19 часот



Стопанската комора пред повеќе од осум месеци побара да биде изменет режимот на продажба на алкохол, за да се намалување на штетите на бизнисите.

Mинистерството за економија ја почна постапката за измени на Законот за трговијата со кои треба да се симне ограничувањето за продажба на алкохолни пијалоци во трговијата на мало.


На Единствениот електронски регистар на прописи – ЕНЕР е објавено известување за почеток на процесот.
Целта на предлог-законот е да се укинат ограничувањата во Законот што беа воведени во 2008 година, а кои се однесуваат на ограничувањето на времето на продажба на алкохолни пијалаци во трговијата на мало.


Основните решенија на предлог-законот предвидуваат продажбата на алкохолни пијалаци во трговијата на мало и понатаму да се врши во лиценцирани продажни објекти, без ограничување на времето за продажба и без посебни услови.


- Предложените изменувања и дополнувања во Законот за трговијата се во функција на укинување на ограничувањата во Законот што се однесуваат на ограничувањето на времето на продажба на алкохолни пијалаци во трговијата на мало, како и уредување на условите за вршење трговија со необработени дијаманти. Наведените ограничувања го намалија бројот на продажни места преку кои производителите на вино и пиво во земјата го вршеа својот пласман (ова особено во руралните средини), без јасно да се постигне целта за намалена консумација на алкохол кај малолетниците. Единствено што се постигна – се ограничи, односно се намали, бројот на трговци на мало што одлучија да продолжат да продаваат алкохолни пијалаци во рамките на времето пропишано во Законот за трговијата. Ваквата состојба ја намали продажбата на алкохолни пијалаци, особено продажбата на вино и пиво во земјата - пишува во законското образложение.
 
Стопанската комора на Македонија пред повеќе од осум месеци побара да биде изменет режимот на продажба на алкохол. Стопанствениците, покрај барањето за укинување на ограничувањето на времето на продажба на алкохол со образложение дека им нанесува големи штети на трговците и на домашните компании производители на алкохолни пијалоци, бараа и да бидат укинати лиценците или да биде намалена висината на надоместокот што треба да се плати за добивање лиценца.

Пренесено: http://www.plusinfo.mk/vest/142305/se-tokmat-zakonskite-izmeni-za-prodazba-na-alkohol-po-19-casot











 

Премиум покровители

Покровители

Силвер покровители

Партнери

Државни институции

Меѓународни институции

© 2008 Стопанска комора на Македонија, задржани сите права